Kwa
bahati mbaya sana siku za karibuni kumetokea mtindo wa hovyo kwa baadhi ya
Watanzania, ambao kwa makusudi au kwa kutokufahamu, wamekuwa wakitoa maneno ya
dhihaka dhidi ya Uhuru wetu, hasa hasa katika siku kama ya leo ya Disemba 9.
Kwa
mfano, wanabeza na kuuliza ipo wapi leo hii hiyo Tanganyika ya kuisherehekea?
Wanauliza kwa dhihaka Miaka 52 baada ya Uhuru hakuna umeme, hakuna dawa
mahospitalini, watoto wanakaa chini mashuleni n.k, kana kwamba hakuna chochote
kilichofanyika au kilicho cha kujivunia. Ni kweli kabisa kuhusu yote hayo
yanayotajwa sentensi ya juu kwavile changamoto bado zipo nyingi sana katika
nchi yetu. Lakini wanaosema hayo pengine wanasahau kwamba kazi ya kujenga nchi
yetu bado haijaisha, ndiyo kwanza imeanza.
Nimefanya
tafsiri ya hotuba aliyotoa Ndugu January Makamba (MB) kwa Watanzania wanaoishi
majimbo ya DMV Marekani juzi Jumamosi katika hafla ya kuadhimisha siku ya
Uhuru. Sehemu kubwa hapa nimemkariri neno kwa neno. Kwa mtizamo wangu, Ndugu
Makamba alifanikiwa kupangua hoja moja baada ya nyingine dhidi ya wale
wanaodhihaki siku ya leo na akaeleza sababu 10 za msingi kwanini tunasherehekea
Uhuru wetu.
Alianza
kwa kufafanua kwamba leo hatuadhimishi Miaka 52 ya Uhuru wa Tanzania, bali
tunaadhimisha Miaka 52 ya Uhuru wa “Tanzania Bara”. Alitukumbusha kwamba Taifa
letu ni Muungano wa nchi mbili. Ibara ya 2 (1) ya Katiba ya Tanzania ya mwaka
1977 inayotumika sasa inasema kwamba “Eneo la Jamhuri ya Muungano ni eneo lote
la Tanzania Bara na eneo lote la Tanzania Zanzibar, na ni pamoja na sehemu yake
ya bahari ambayo Tanzania inapakana nayo.” Tungeweza kusema leo tunasherehekea
Miaka 52 ya Uhuru wa “Tanganyika”, lakini leo Tanganyika haipo tena na nafasi
yake kikatiba leo hii inashikiliwa na Tanzania Bara.
January
alisema kwamba Miaka 52 ni mingi sana kwa binadamu, lakini kwa Taifa ni miaka
michache sana. Nchi ya Marekani, kwa mfano, imekuwa huru kwa Miaka zaidi ya
200. Safari yao katika kujenga nchi yao imekuwa ndefu na yenye mitihani mingi
lakini bado wao wenyewe wanasema kazi ya kuijenga nchi yao kuwa bora zaidi
haijakamilika (“the work of building a more perfect Union is not complete”).
Kwahiyo kiumri utaona kwamba sisi ndio kwanza tumeanza safari ya kuijenga nchi
yetu.
Hizi
ndizo sababu 10 alizotoa Ndugu Makamba akijibu swali:
Kwanini
tunasherehekea Uhuru wetu?
1) Uhuru
wetu bado upo, haujapotea. Japo leo hii Tanganyika haipo tena, bado tuna haki
ya kusherehekea siku tulipopata Uhuru kwavile mpaka leo Uhuru huo tunao. Tuna
mamlaka kamili na tunajitawala wenyewe tofauti na iliyokuwa awali. Katiba ya
Tanzania niliyoitaja katika kifungu chake cha 151(1) kinafafanua kuhusu
“Tanzania Bara” kuwa ni “eneo lote la Jamhuri ya Muungano ambalo zamani ilikuwa
eneo la Jamhuri ya Tanganyika.” Kwa maana nyingine, japo jina la Tanganyika
halitumiki tena, eneo lake bado lipo, watu wake bado wapo, mamlaka yake na
Uhuru wake umezingatiwa na unatambulika ndani ya Katiba ya sasa. Kutokuwapo kwa
Tanganyika ni kwa jina tu!
2) Tunasherehekea
kwavile kuwapo kwa Tanzania Bara kunapelekea kuwapo kwa NCHI ya Tanzania (kama
jinsi Mapinduzi ya Zanzibar, ambayo mwakani tutasherehekea Miaka 50, vile vile
yanapelekea kuwapo kwa nchi ya Tanzania).
3) Tunasherehekea
Uhuru kama sehemu ya kuutambua UTAIFA wetu wa Tanzania. Uhuru wetu ndio
unaotambulisha Taifa letu. Wakati wa kupata Uhuru ndipo tulipopata mamlaka
kamili, bendera, nembo, mipaka na pia tulitambulika na wenzetu duniani kwamba
sisi ni Taifa.
4) Tunasherehekea
Uhuru wetu kama njia ya kukumbushana kuhusu haja ya kuendelea kuulinda Uhuru
wetu.
5) Tunasherehekea
Uhuru wetu kama njia ya kukumbushana kuhusu haja ya kuendelea kuulinda Muungano
wetu, kwa vile bila ya Uhuru (na Mapinduzi Zanzibar) tusingekuwa na Muungano.
6) Tunasherehekea
Uhuru wetu kwavile tuna haja pia ya kuwaenzi wale waliopigania Uhuru wetu kwa
vile walifanya kazi kubwa, wengi walifungwa, wengi walipoteza mali zao na
maisha yao ili sisi tuwe Huru.
7) Tunasherehekea Uhuru wetu ili kukumbushana kwamba
kazi ya kuijenga nchi yetu bado haijaisha. January alisema kwamba
viongozi waliopigania Uhuru wetu walianza pia kazi ya kujenga Taifa letu kwa
kutuunganisha katika makabila, katika dini n.k. Zikafanyika jitihadi nyingi na
za makusudi za kuijenga nchi yetu ili iwe nchi moja ya watu wanaopendana,
wanaoheshimiana, wanaoaminiana, wanaoshirikiana, wanaofanya kazi kwa pamoja
katika kujenga Taifa. Hiyo kazi ya kujenga nchi yetu bado haijaisha kwa vile
bado kuna changamoto nyingi sana za maendeleo. Vile vile, kuna changamoto mpya
ambazo zimejitokeza zinazohatarisha Umoja wa Taifa letu. Hizi ni zile nyufa
alizotaja Mwalimu Nyerere kama vile udini, ukabila, rushwa n.k. Kwahiyo Uhuru
wetu upo hatarini sana kama hatutajidhatiti kwa dhati kuhakikisha kwamba bado
tunaendelea na kazi ya ujenzi wa Taifa letu.
8) Kuthaminiwa
Utu wetu. January alikumbusha kwamba hii ndiyo ilikuwa sababu kubwa ya msingi
kwanini wazee wetu walipigania kupata Uhuru. Walitaka kuondokana na
kudhalilishwa, kutawaliwa, kutumwa, kunyanyaswa, kunyonywa na kuwa chini ya mtu
mwingine kutoka sehemu nyingine. Mtu huyo anakuja anakalia nchi yako halafu
anakufanya wewe kuwa ni mtu wa daraja la chini, kisha anakuamulia uishi vipi,
anakuamulia lugha gani utumie, anaamua watoto wako wasome nini n.k. Wakasema
hapana, kila mtu anahaki ya kuwa Huru na kuthaminiwa Utu wake, kujikomboa
kwenye udhalimu na kujitoa kwenye udhalilishaji.
9) Lengo
la kupigania Uhuru lilikuwa ili tupate uwezo wa Kujiamulia mambo yetu yenyewe
ili kutengeneze nchi ambayo tunaitaka sisi wenyewe. Lakini January aliweka
bayana kwamba Malengo ya Uhuru bado hatujayafikia yote. Na ndiyo kazi ambayo
sote tunapaswa kuifanya ili malengo hayo tuyafikie. Kila awamu ya uongozi wa
nchi yetu baada ya Uhuru imetusogeza hatua moja au kadhaa kufikia Malengo ya
Uhuru. Kikubwa ni kwamba bado tunayo kazi ya kujenga uwezo wa kiuchumi na uwezo
wa kiutawala ili kuondoa umaskini wa watu wetu ili tuweze kufikia Malengo ya
Uhuru wetu.
10) Pamoja na changamoto zilizopo, ambazo
alisema Serikali ya sasa chini ya Rais Kikwete inazitambua na inaendelea
kuzifanyia kazi, nchi yetu bado ni nchi nzuri ya kuishi duniani. Hili pia ni
jambo jema la kuherehekea wakati wa maadhimisho ya Uhuru. Watanzania bado kwa kiasi kikubwa ni
wamoja, wanapendana na wanaheshimiana.
January
alimaliza kwa kusema, “Nchi yetu bado inaweza kuwa nzuri sana kuliko ilivyo
sasa. Sisi wenyewe tunaweza kuiharibu au kuijenga nchi yetu”.
No comments:
Post a Comment